ਜਲੰਧਰ 'ਚ ਦੇਹ ਵਪਾਰ ਦਾ ਪਰਦਾਫਾਸ਼: ਵਚਿੰਤ ਨਗਰ 'ਚ ਛਾਪੇਮਾਰੀ ਦੌਰਾਨ 8 ਵਿਅਕਤੀ ਇਤਰਾਜ਼ਯੋਗ ਹਾਲਤ 'ਚ ਕਾਬੂ

ਜਲੰਧਰ- ਸ਼ਿਕਾਇਤ ਦੇ ਆਧਾਰ 'ਤੇ ਰਾਮਾਮੰਡੀ ਪੁਲਿਸ ਨੇ ਛਾਪਾ ਮਾਰ ਕੇ ਦੇਹ ਵਪਾਰ ਦੇ ਅੱਡੇ ਦਾ ਪਰਦਾਫਾਸ਼ ਕੀਤਾ। ਪੁਲਿਸ ਨੇ ਛਾਪਾ ਮਾਰ ਕੇ ਅੱਠ ਵਿਅਕਤੀਆਂ ਨੂੰ ਇਤਰਾਜ਼ਯੋਗ ਹਾਲਤ ਵਿੱਚ ਫੜ ਲਿਆ। ਸ਼ਹਿਰ ਦੇ ਬਾਹਰੀ ਹਿੱਸੇ ਵਿੱਚ ਵਚਿੰਤ ਨਗਰ ਵਿੱਚ ਪੈਂਦੀ ਕਲੋਨੀ ਪਿੰਡ ਸ਼ੇਖੇ ਵਿੱਚ ਇਹ ਧੰਦਾ ਚੱਲ ਰਿਹਾ ਸੀ।

ਥਾਣਾ ਰਾਮਾਮੰਡੀ ਦੇ ਇੰਚਾਰਜ ਨਵਦੀਪ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸ਼ਿਕਾਇਤ ਮਿਲੀ ਸੀ ਕਿ ਪਿੰਡ ਸ਼ੇਖੇ ਵਿੱਚ ਪੈਂਦੇ ਵਚਿੰਤ ਨਗਰ ਵਿੱਚ ਇੱਕ ਔਰਤ ਦੇਹ ਵਪਾਰ ਦਾ ਧੰਦਾ ਚਲਾ ਰਹੀ ਹੈ। ਇਸਦੇ ਲਈ ਇੱਕ ਟੀਮ ਬਣਾਈ ਗਈ ਅਤੇ ਪਹਿਲਾਂ ਇੱਕ ਵਿਅਕਤੀ ਨੂੰ ਗਾਹਕ ਦੇ ਤੌਰ 'ਤੇ ਭੇਜਿਆ ਗਿਆ ਤਾਂ ਜੋ ਸੱਚਾਈ ਦਾ ਪਤਾ ਲਗਾਇਆ ਜਾ ਸਕੇ ਕਿ ਕੀ ਇੱਥੇ ਅਸਲ ਵਿੱਚ ਇਹ ਕੰਮ ਚੱਲ ਰਿਹਾ ਹੈ ਜਾਂ ਕਿਸੇ ਨੇ ਝੂਠੀ ਸ਼ਿਕਾਇਤ ਕੀਤੀ ਹੈ।

ਪੁਲਿਸ ਨੂੰ ਆਪਣੇ ਨੈੱਟਵਰਕ ਰਾਹੀਂ ਸੂਚਨਾ ਮਿਲੀ ਕਿ ਗੁਰਪ੍ਰੀਤ ਕੌਰ ਉਰਫ ਜੋਤੀ ਪਤਨੀ ਸੁਖਵਿੰਦਰ ਸਿੰਘ ਦੇਹ ਵਪਾਰ ਦਾ ਧੰਦਾ ਚਲਾ ਰਹੀ ਹੈ। ਵਚਿੰਤ ਨਗਰ 'ਚ ਜਿਸ ਮਕਾਨ 'ਚ ਇਹ ਧੰਦਾ ਚੱਲ ਰਿਹਾ ਹੈ, ਉਹ ਗੁਰਪ੍ਰੀਤ ਕੌਰ ਦਾ ਨਹੀਂ ਹੈ, ਸਗੋਂ ਉਸ ਨੇ ਉਹ ਮਕਾਨ ਕਿਰਾਏ 'ਤੇ ਲਿਆ ਹੋਇਆ ਹੈ। ਪੁਲਿਸ ਨੇ ਜਦੋਂ ਘਰ ’ਤੇ ਛਾਪੇਮਾਰੀ ਕੀਤੀ ਤਾਂ ਅੱਠ ਵਿਅਕਤੀ ਰਵੀ ਕੁਮਾਰ ਪੁੱਤਰ ਰਾਜੇਸ਼ ਕੁਮਾਰ ਵਾਸੀ ਅਮਰੀਕ ਨਗਰ, ਇੰਦਰਜੀਤ ਸਿੰਘ ਪੁੱਤਰ ਹਰੀਪਾਲ ਵਾਸੀ ਖਜੂਰਲਾ ਫਗਵਾੜਾ ਜ਼ਿਲ੍ਹਾ ਕਪੂਰਥਲਾ, ਦਵਿੰਦਰਪਾਲ ਪੁੱਤਰ ਹਰਬੰਸ ਲਾਲ ਵਾਸੀ ਸੰਤੋਖਪੁਰਾ, ਦਿਨੇਸ਼ ਪੁੱਤਰ ਸ਼ਾਹਿਦ ਵਾਸੀ ਢੰਨ ਮੁਹੱਲਾ, ਭਗਵਾਨ ਦਾਸ ਪੁੱਤਰ ਮੀਤ ਰਾਮ ਸਿੰਘ ਵਾਸੀ ਜੰਡੂਸਿੰਘਾ, ਸੁਦਰਸ਼ਨ ਪੁੱਤਰ ਰਾਮ ਪਰਵੇਸ਼ ਵਾਸੀ ਮੁਸਲਿਮ ਕਲੋਨੀ ਕਾਲੀ ਰੋਡ, ਸ਼ਾਹਰੁਖ ਪੁੱਤਰ ਮੁਹੰਮਦ ਮੇਹਤਾਬ ਵਾਸੀ ਅਟਾਰੀ ਬਾਜ਼ਾਕ ਤੇ ਬਲਗੁਲ ਰਹਿਮਾਨ ਪੁੱਤਰ ਜਹਾਰ ਵਾਸੀ ਲਸੂੜੀ ਮੁਹੱਲਾ ਬਸਤੀ ਦਾਨਸ਼ਮੰਦਾ ਨੂੰ ਇਤਰਾਜ਼ਯੋਗ ਹਾਲਤ 'ਚ ਫੜਿਆ ਗਿਆ। ਹਾਲਾਂਕਿ ਗੁਰਪ੍ਰੀਤ ਤੋਂ ਇਲਾਵਾ ਪੁਲਿਸ ਨੇ ਇਹ ਧੰਦਾ ਕਰਨ ਵਾਲੀਆਂ ਫੜੀਆਂ ਗਈਆਂ ਔਰਤਾਂ ਦੇ ਨਾਵਾਂ ਦਾ ਖੁਲਾਸਾ ਨਹੀਂ ਕੀਤਾ ਹੈ। ਥਾਣਾ ਇੰਚਾਰਜ ਨਵਦੀਪ ਸਿੰਘ ਨੇ ਦੱਸਿਆ ਕਿ ਫੜੇ ਗਏ ਸਾਰੇ ਮੁਲਜ਼ਮਾਂ ਖ਼ਿਲਾਫ਼ ਪ੍ਰਿਵੈਂਸ਼ਨ ਆਫ ਇਮੋਰਲ ਟ੍ਰੈਫਿਕਿੰਗ ਐਕਟ ਦੀ ਧਾਰਾ 3/4/5 ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਉਨ੍ਹਾਂ ਨੂੰ ਈਡੀਸੀਐਮ ਦੀ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।